A investigación do Grupo Operativo Oliveiras de Galicia define as estratexias de multiplicación para achegar once variedades autóctonas ao sector produtivo
Tres anos de ensaios confirman que as técnicas por estaca clásica e in vitro son complementarias e permiten deseñar unha estratexia específica para cada variedade. Os resultados compartidos hoxe co sector representan un paso máis para que este patrimonio xenético único poida chegar a viveiros e produtores. Xa se transferiu material vexetal aos viveiros e agora, na seguinte fase, vaise facer o escalado industrial de ambas as metodoloxías; nos próximos dous anos haberá máis planta dispoñible. O comportamento das once variedades estudadas en diferentes condicións edafoclimáticas é unha das liñas que deberá continuar máis alá deste Grupo Operativo, para orientar a investigación cara ás necesidades prácticas da futura olivicultura galega e desenvolver unha DOP de aceite de Galicia.
