Neste sétimo número recóllese o evento de difusión celebrado a principios de xullo para compartir as principais leccións aprendidas durante os tres anos de implementación de DOWN TO EARTH en Galicia. Esta xornada tamén marcou o lanzamento de EIRA (Espazo de Innovación Rural Aplicada), unha iniciativa colaborativa baseada nos intercambios e nos resultados de investigación do proxecto.

O concello ourensán de Toén acolleu un obradoiro do proxecto europeo BIOservicES para deseñar un modelo de Pagamento por Servizos Ecosistémicos adaptado ao contexto galego. A Fundación Juana de Vega, que é unha das entidades socias desta iniciativa en Galicia, colaborou activamente na preparación e organización da actividade na que participaron viticultores, adegas, administracións, persoal investigador e outras entidades vinculadas ao sector.

Durante unha visita técnica de dous días coñeceron o traballo do Grupo Operativo Oliveiras de Galicia para multiplicación a grande escala de plantas certificadas de 11 variedades de oliveiras autóctonas para abastecer os viveiros; e do Grupo Operativo Avea Moura para valorización deste cereal rústico, propio da nosa comunidade, e que ten unhas características agronómicas e compostos especiais. Este encontro transnacional foi unha oportunidade para visibilizar a innovación que se está facendo na nosa comunidade e para conectar o noso sector agroalimentario con outras experiencias europeas.

A Fundación Juana de Vega será a anfitrioa este mércores 17 e o xoves, 18 de xuño dunha “cross-visit” no marco do proxecto Grupo Operativo Oliveiras de Galicia, que coordina. O grupo de expertos da Rede PAC e representantes doutra ducia de Grupos Operativos de Romanía, Bélxica, Italia, Grecia, Croacia, Eslovenia e España desprazaranse entre a sede da Fundación en Oleiros, Valga, Brión e Carral.

Entre o 1 e o 3 de xuño, o equipo da Fundación Juana de Vega asistiu en Beja (Baixo Alentejo, Portugal) á 3ª reunión do consorcio Soil&WineResidues, organizada por CIMBAL, como socio anfitrión. Este encontro permitiu poñer en común os avances técnicos do proxecto e extraer unha conclusión relevante do traballo desenvolvido durante o último semestre no marco desta investigación aplicada: o sector vitivinícola recoñece a necesidade de evolucionar cara a modelos máis sostibles.