Introdución
No contexto actual de crise climática, gran desafío ao que se enfrontará o ser humano durante as próximas décadas, a necesidade de adaptación da planificación e deseño das nosas cidades e espazos públicos cara a modelos máis sostibles e racionais revélase como un dos principais retos.
Esta preocupación xa foi recollida pola UE na Estratexia Europea en materia de Infraestrutura Verde, recoñecéndoa como unha ferramenta de eficacia probada para solucionar as problemáticas de perda de biodiversidade e conectividade ecolóxica nos ecosistemas, derivadas dos sucesivos procesos de urbanización e construción de infraestruturas grises. Porén, as intervencións nos espazos públicos, tanto a nivel de deseño como de xestión posterior dos mesmos, están aínda suxeitas a unha serie de derivas e prácticas contrarias aos procesos e solucións baseadas na natureza (NBS) que se pretenden impulsar dende Europa.
Debemos promover o deseño das nosas paisaxes cotiás, de proximidade, como proxectos innovadores, comprometidos có medio e coa sociedade, nos que se incorporen procesos naturais e se desenvolvan boas prácticas que contribúan para a consecución dos Obxectivos de Desenvolvemento Sostible. Paisaxes perdurables a través dunha xestión comprometida por parte das administracións, pero tamén da sociedade e as empresas.
A Escola Galega da Paisaxe Juana de Vega desenvolve estas xornadas formativas enfocadas ao eco-deseño de espazos públicos, co apoio da Deputación de A Coruña, levando os criterios da infraestrutura verde á escala de detalle co obxectivo de acadar que as nosas paisaxes sexan máis resilientes fronte á crise climática, mellorando os servizos ecosistémicos que prestan, especialmente en contornas urbanas.
Obxectivos
- Actualizar a formación en eco-deseño de técnicos municipais e profesionais independentes con competencia para intervir en espazos públicos.
- Divulgar a infraestrutura verde e as solucións baseadas na natureza como alternativa sostible para acadar paisaxes resilientes.
- Mellorar o coñecemento sobre os requirimentos da paisaxe a través da divulgación de casos prácticos de referencia da man dos propios autores.
- Reflexionar sobre o futuro da xestión dos espazos públicos e como enfocala cara a modelos máis eficientes.
- Avaliar os servizos ecosistémicos existentes e potenciais dun espazo público para incorporar esta información como parte esencial do proceso de deseño.
- Facilitar o intercambio de opinións e o debate en grupo, enfrontándose a un obradoiro práctico que permita aos asistentes testar os coñecementos adquiridos.
