A Fundación Juana de Vega organiza este taller no marco do proxecto ECOSPHEREWINES (cofinanciado por Interreg Sudoe) co obxectivo de contribuír á caracterización paisaxística dos pilotos que se van a realizar en España-Portugal e Francia. Entre os meses de xuño e xullo, ademais desta actividade que levará a cabo na IXP Betanzos, localizada na Reserva de Biosfera Mariñas Coruñesas e Terras do Mandeo (Galicia), realizaranse outros tres talleres participativos na Reserva de Biosfera transfronteiriza Meseta Atlántica (DO Arribes, en Fermoselle, Zamora); Gaillac, en Occitania (suroeste de Francia) e en Vila Nova de Foz Côa, en Rede Natura 2000.
Introdución
Unha paisaxe é unha realidade física que se percibe e a percepción depende da mirada do observador. Unha mirada que está influída pola súa cultura, formación e ambiente. Desde a aprobación do Convenio Europeo da Paisaxe, no ano 2000, estendeuse a vontade de identificar e cuantificar todas as paisaxes presentes no noso territorio. Neste exercicio cobra peculiar relevancia detectar o que fai diferente unha paisaxe doutra, é dicir, determinar de que maneira unha paisaxe pode ser considerada singular. Isto é o que denominamos o carácter da paisaxe. Para iso, proponse un taller dun día que profunde no coñecemento e posta en valor da paisaxe que conforma un dos ámbitos de traballo do proxecto ECOSPHEREWINES, englobado dentro da IXP Betanzos.
Obxectivo
O obxecto deste taller é analizar a percepción das paisaxes que conforman a IXP de Betanzos por parte de usuarios con perfís diversos, e establecer un marco de intercambio e diálogo que permita ampliar o coñecemento sobre os valores da paisaxe.
Os obxectivos concretos son:
- Recoller as percepcións dos participantes sobre as distintas paisaxes do ámbito de estudo.
- Caracterizar as unidades de paisaxe que conforman o ámbito de estudo.
- Identificar servizos ecosistémicos na unidade de paisaxe que inclúe o viñedo experimental onde, posteriormente, se realizarán as intervencións.
Metodoloxía
O taller desenvolverase ao longo de toda unha xornada coa combinación de distintas actividades, incluíndo visitas de campo a puntos estratéxicos dentro da área de estudo e traballo en grupo en aula. As distintas actividades serán conducidas por técnicos/as en paisaxe e requirirase de forma expresa a participación proactiva do alumnado.
Prazas
O límite de participantes neste taller é de 20 persoas para poder garantir un bo traballo en grupo. As inscricións seguirán a orde de rexistro e comunicaráselles o seu reserva de praza vía telefónica/correo electrónico. Actividade gratuíta.