O próximo martes, 24 de setembro (desde 17:30h) o consorcio do Grupo Operativo DIXITEGA organiza a xornada final para presentar os resultados deste proxecto de investigación aplicada na sede do Consello Regulador das IXP de Carne de Vacún de Galicia, en Santiago de Compostela.

Desde 2022, e durante tres anos, o consorcio do Grupo Operativo DIXITEGA estivo traballando man a man co sector para desenvolver a plataforma dixital dixitega.com; un novo espazo dixital en permanente actualización e accesible 24/7 no que se integran diversas fontes de datos relevantes para todos os axentes que forman a cadea de valor da IXP Ternera Gallega.

O futuro da Indicación Xeográfica Protexida Ternera Gallega está estreitamente ligado ás novas tecnoloxías. A dixitalización ofrece ferramentas esenciais para impulsar unha posición máis competitiva e sostible deste sector no mercado. Ademais, é unha solución accesible e un recurso fácil e sinxelo para axudar aos pequenos produtores a optimizar o seu traballo diario. O obxectivo principal de DIXITEGA foi, por tanto, achegarlles solucións prácticas e innovadoras aos productores para que transformen os desafíos en oportunidades nun sector estratéxico para o medio rural de Galicia.

Para asistir é necesaria inscrición previa no seguinte formulario.