O vindeiro mércores, 22 de xullo, terá lugar o acto de presentación do proxecto SABERES DO MONTE, unha iniciativa impulsada pola Fundación Juana de Vega xunto coa Universidade de Santiago de Compostela, a Universidade da Coruña e a Asociación Galega de Custodia do Territorio.
O proxecto traballa para conservar e recuperar hábitats de alto valor ecolóxico en cinco zonas de montaña de Galicia, grazas ao traballo da poboación local. Para iso, promove as actividades ligadas ao territorio, como a gandería extensiva, o manexo tradicional de cabalos en liberdade, a apicultura e o ecoturismo.
Estas actividades achegan beneficios a toda a sociedade e desempeñan un papel fundamental na conservación da biodiversidade e no desenvolvemento rural. O proxecto busca que esa contribución sexa máis visible e recoñecida, apoiando as persoas que fan posible un monte vivo.
SABERES DO MONTE conta co apoio da Fundación Biodiversidad do Ministerio para la Transición Ecológica y el Reto Demográfico (MITECO), a través do cofinanciamento do Fondo Europeo de Desenvolvemento Rexional (FEDER). Tamén colaboran co proxecto a área de Medio Rural, do Mar e Mocidade da Deputación de Lugo, Caixa Rural Galega e a Fundación Naiterra.