Os sequeiros de Pena Folenche, na Pobra de Trives, serán os protagonistas da nova actividade organizada por SoutoLAB dentro do seu programa de divulgación e intercambio de coñecemento arredor da cultura da castaña. A xornada, titulada "Patrimonio cultural da castaña: memoria e paisaxe", celebrarase o vindeiro venres, 24 de xullo, e combinará sesións técnicas no Auditorio Julio Vázquez cunha visita interpretativa aos sequeiros.
A actividade busca afondar na dimensión patrimonial dos soutos e da cultura da castaña nun territorio especialmente vinculado a este cultivo. As comarcas de Valdeorras e Terra de Trives concentran arredor do 20% dos soutos de Galicia, un patrimonio natural e cultural que sitúa esta zona como unha das principais áreas castiñeiras do país. Neste contexto, os sequeiros de Pena Folenche constitúen un dos mellores exemplos da arquitectura tradicional asociada ao aproveitamento da castaña en Galicia. Trátase dun conxunto de pequenas edificacións de pedra que durante séculos serviron para o secado da castaña e como aloxamento temporal das persoas que se desprazaban ata os soutos durante a campaña de recollida. Representan un valioso testemuño da organización social, económica e produtiva que xirou historicamente arredor deste cultivo.