A Fundación Juana de Vega no marco das axudas da Rede Eusumo para a realización de actividades de promoción e impulso do cooperativismo e da economía social, organiza unha serie de xornadas de divulgación de aspectos relacionados co emprendemento innovador no sector agroalimentario, poñendo o foco nas entidades de economía social.
As derradeira das catro xornadas previstas para 2024 terá lugar en colaboración co Centro de Formación e Experimentación Agaria (CFEA) de Sergude. Ver como chegar en [Google Maps].
A xornada conta cunha primeira parte de divulgación do emprendemento en economía social no sector agroalimentario, charlas sobre aspectos innovadores de mellora da competitividade das empresas agroalimentarias. O segundo día, a formación complétase cunha mesa redonda con entidades sociais do sector agraolimentario que aplican a innovación nos seus plans de negocio, así como cunha visita a unha entidade de economía social da contorna.
Obxectivo
Estas xornadas queren contribuír ao desenvolvemento da cultura do emprendemento e das habilidades innovadoras no sector de produción e transformación de alimentos a través de modelos produtivos baseados na economía social. Búscase xerar non só impacto económico no territorio, se non tamén un impacto social e ambiental positivo.
En concreto, os asistentes poderán:
- Coñecer os elementos máis relevantes dun plan de márketing, e o modo de aplicar na práctica os seus principios básicos en calquera negocio.
- Coñecer as novas tendencias de deseño e presentación de etiquetas e envases para as producións agroalimentarias.
Así mesmo, estas xornadas axudarán a crear sinerxías entre os centros educativos colaboradores e as empresas agroalimentarias da zona, así como entre o alumnado dos centros e o ecosistema empresarial da comarca.
A quen se dirixe?
As xornadas teñen tres grupos destinatarios:
- Produtores primarios locais que poden incrementar a rendibilidade da súa explotación con novas ideas de negocio vinculadas a pequenas transformacións a escala artesanal en produtos alimentarios de calidade.
- Os propietarios ou traballadores de pemes agroalimentarias interesados en abordar novos desenvolvementos innovadores.
- Alumnado das escolas participantes (a gran parte deles menores de 30 anos) que poden ser futuras persoas emprendedoras, ben como remuda das explotacións familiares ou como traballadores das entidades do sector agroalimentario.
Prazas
10 prazas dispoñibles
