Cubertas as prazas para asistir ao obradoiro coa arquitecta e paisaxista Mary Bowman, os interesados aínda poden participar nas xornadas internacionais "Paisaxes litorais consilientes” inscribíndose en todas as sesións en conxunto ou en cada sesión por separado. O prazo estará aberto ata o luns, 1 de setembro (14:00h) a través do formulario habilitado na nosa web na seguinte ligazón: https://juanadevega.org/xornadas_e_cursos/xornadas-internacionais-paisaxes-litorais-consilientes
O prezo xeral é de 100€, 25€ para cada sesión individual e 30€ para estudantes.
Durante os catro venres de setembro (5, 12, 19 e 26) e o sábado 27, a Fundación Juana de Vega, co apoio da Deputación da Coruña, organiza as "Xornadas internacionais Paisaxes litorais consilientes | A Coruña: caso de estudo para o desenvolvemento sostible desde a perspectiva da paisaxe, o capital natural e a infraestrutura verde" durante as que reflexionaremos sobre o futuro do borde litoral da cidade con profesionais e estudos de paisaxismo referentes en Europa e EE.UU.
Os asistentes terán oportunidade de escoitar, falar e recoller a visión de Gustafson Porter + Bowman (Londres) da man da socia e fundadora Mary Bowman; de West8 (Róterdam), que estará representado polo seu director creativo Daniel Vasini; de STOSS (Boston), desde onde viaxará Chris Reed, ou de Edward Fox, profesor titular de Arquitectura da Paisaxe na Manchester University (Manchester).
De España, os relatores serán Julián Sastre, presidente do Instituto de Movilidad de España; Alfonso Vegara, presidente da Fundación Metrópoli; e Francisco Javier Álvarez, xefe do Servicio Xurídico da Autoridad Portuaria de Santander (Cantabria).
Ademais, en todas as xornadas participarán actores locais que achegarán perspectivas clave sobre o caso de estudo centrándose en temáticas como infraestruturas e mobilidade, novas oportunidades económicas, sociais e culturais; infraestrutura verde, paisaxe e identidade ou planificación integrada.
A Fundación Juana de Vega será en setembro un espazo colaborativo de diálogo, debate, participación activa e proposta de ideas innovadoras sobre novos paradigmas de urbanización sostible e máis integradora.
