Galicia conta con 313 concellos, moitos deles de pequeno tamaño e cunha poboación moi dispersa. Esta realidade, unida ao avellentamento e á perda de habitantes no rural, dificulta que os municipios poidan manter servizos públicos de calidade en igualdade coas áreas urbanas.

Para facer fronte a estes retos, a Xunta de Galicia, en virtude dun convenio de colaboración coa Fundación Juana de Vega, impulsou o estudo "A planta local galega. Impulso dos procesos de fusión municipal" no que participaron as tres universidades galegas. Nel analízase a nosa planta municipal desde diferentes perspectivas: política, xeográfica, xurídica, económica e sociolóxica.

O resultado é unha análise completa da realidade local galega que propón solucións para avanzar cara a concellos máis fortes, sostibles e capaces de garantir servizos de calidade, explorando tanto os procesos de fusión como outras fórmulas de cooperación. Con este fin, o traballo recolle un conxunto de propostas de actuación orientadas a promover reformas lexislativas, mellorar os incentivos fiscais e financeiros, reforzar a comunicación e a participación cidadá, xerar maior coñecemento técnico e científico e establecer unha folla de ruta progresiva que permita modernizar de xeito ordenado a organización da planta local de Galicia.