No marco do convenio asinado pola Fundación coa Consellería de Medioambiente, Territorio e Infraestruturas, impulsouse un programa formativo para introducir nos centros de educación infantil e primaria, tanto de carácter público como privado de Galicia, a posta en valor da paisaxe.
Este programa formativo pioneiro en Galicia, persegue concienciar aos escolares, desde as idades máis temperás, sobre a necesidade de protexer, poñer en valor e integrar a paisaxe e patrimonio natural de Galicia como un elemento fundamental no desenvolvemento social, cultural e económico dun territorio.
Desenvolvéronse talleres directamente nos centros, ofrecendo material didáctico dirixido aos nenos e adaptado a cada tramo educativo. Nestes talleres se parte do concepto de paisaxe e patrimonio natural, para posteriormente ir debullando todas as cuestións relativas ao seu coñecemento, a súa evolución, a súa protección e a súa posta en valor.
Os talleres foron impartidos por Mercedes Máquez Roel, da Escola Galega da Paisaxe e Manuel Salgado Blanco, por parte da Xunta de Galicia.
Comezaron a impartirse en febreiro de 2011 no CPI Cervantes e no IES de Becerreá, na provincia de Lugo, co título Paisaxe e Cor, e posteriormente desenvolvéronse nos seguintes centros educativos:
- CIP Antonio Failde en Coles.- Dirixido a alumnos de primeiro curso da ESO, no que se traballou sobre aspectos positivos e negativos da paisaxe próxima e a súa representación gráfica.
- CIFP A Farixa en Ourense.- Este taller tivo por obxectivo crear un debate cos alumnos do ciclo superior de turismo sobre a paisaxe da zona ofrecendo unhas imaxes da área paisaxística Ribeiras do Miño Sil. Os alumnos debían de expoñer as características, oportunidades e problemas cos que se podían atopar os axentes turísticos á hora de poñelos en valor.
- IES CIP de Castroverde, con alumnos de 4º de ESO.
- En Lama dás Quendas, Chantada, con alumnos de 3º e 4º de ESO.
- IES Taboada Chivite e CEIP Vicente Risco, de Verín, dirixido a alumnos de 5º e 6º de ESO.
- CEIP Condesa de Fenosa e CEIP Casaio, ambos do Barco de Valdeorras, e tamén dirixido a alumnos de 5º e 6º de ESO.
- Instituto de Ensino Secundario Laxeiro, en Lalín.- Participaron alumnos de terceiro da ESO e nesta ocasión fíxose énfase na problemática dos incendios forestais. Os alumnos presentaron varios traballos que realizaron sobre as causas e os efectos dos incendios forestais sobre a paisaxe, a fauna, a flora e a biodiversidade en xeral.
Tamén no marco do programa da Estratexia da Paisaxe de Galicia e dirixido a profesores de centros educativos de Galicia, a arquitecta Mercedes Máquez Roel da Escola Galega da Paisaxe, xunto con Manuel Borobio Sanchiz, Director do Instituto de Estudos do Territorio, impartiron na Escola Galega de Administración Pública a conferencia titulada “A paisaxe como ferramenta para a comprensión da sustentabilidade do territorio”.