O Foro Territorio Rural Resiliente é unha iniciativa independente impulsada desde a sociedade civil que busca contribuír a un rural máis dinámico, resiliente e preparado para afrontar os retos demográficos, económicos e ambientais, a través dunha mellor ordenación e xestión do territorio.
Para iso, a iniciativa promove un proceso participativo no que especialistas de diferentes ámbitos analizan os principais desafíos do rural galego e formulan propostas de acción. Desta forma, máis de 120 persoas expertas colaboran nas seis mesas de traballo que abordan temas relevantes arredor da visión territorial.
O Foro Territorio Rural Resiliente parte da constatación de que o territorio galego experimentou profundas transformacións no último medio século: a concentración da poboación, a perda de actividade agraria, a expansión forestal sen planificación e a incidencia de lumes son algúns dos factores obrigan a repensar a organización e a xestión do rural.
Ante estes retos, é necesario consolidar unha visión estratéxica de ordenación territorial, afianzar os avances en xestión de terras e impulsar a rexeneración agraria do territorio, conservando e potenciando os seus valores ambientais.
Obxectivos
O obxectivo principal do Foro Territorio Rural Resiliente é contribuír á mellora da ordenación e xestión territorial no medio rural en Galicia, e axudar así a crear un territorio rural máis activo, resiliente ao lume e preparado para afrontar os retos económicos, demográficos, climáticos e ambientais.
Os obxectivos específicos son:
- Avanzar nunha visión territorial resiliente e xusta, mediante a cohesión dos axentes e organizacións claves no ámbito.
- Realizar unha diagnose da vulnerabilidade do territorio fronte aos incendios.
- Reflexionar sobre o estado dos instrumentos de ordenación e xestión territorial, con foco nos usos agrarios no rural.
- Mellorar a coordinación público-privada e institucional na posta en marcha de políticas de ordenación e xestión territorial.
- Visibilizar experiencias de éxito na recuperación da xestión do espazo rural.
Quen somos
O Foro Territorio Rural Resiliente está organizado pola Fundación Juana de Vega e o Laboratorio do Territorio da USC (LaboraTe), coa colaboración da Fundación RIA, a Fundación Roberto Rivas e o Colexio Profesional de Xornalistas de Galicia.
Mesas de traballo
O Foro estrutúrase a través de seis mesas de traballo que contan coa implicación de persoas expertas e representantes de diferentes sectores profesionais e organizativos vinculados ao rural galego.
As mesas de traballo son o núcleo do proceso preparatorio e participativo do Foro, e serven para identificar problemas, analizar ferramentas e políticas existentes e propoñer liñas de actuación que poidan contribuír a unha mellor xestión do espazo rural.
Cada mesa aborda unha temática clave:
- Mesa “Visión estratéxica do territorio rural”
- Mesa “Ordenación de usos e instrumentos de planificación no rural”
- Mesa “Mobilización e xestión activa do espazo agroforestal”
- Mesa “Persoas, poboación e actividades no rural”
- Mesa “Gobernanza e cooperación público-privada para a ordenación territorial”
- Mesa “Comunicación e concienciación social”
Evento final
As conclusións que xurdan destas sesións servirán de base para o evento público final, que se celebrará o 28 de maio en Santiago de Compostela, onde se presentarán as principais recomendacións e liñas de acción xurdidas do proceso.
