As xornadas están organizadas polo Concello de Vigo en colaboración coa Fundación Juana de Vega, a través da Área de Paisaxe e Territorio. O encontro está dirixido a profesionais do paisaxismo, da arquitectura, da ecoloxía e da xestión pública, e pretende crear un espazo de intercambio de coñecementos e experiencias entre expertos nacionais e internacionais. O programa inclúe exposicións e intervencións de especialistas do Instituto do Patrimonio Cultural de España, Patrimonio Nacional, Universidade de Granada, Universidade de Florencia, Comité Científico de Sintra e doutros expertos en paisaxe e arquitectura.

A inscrición estará aberta ata o 4 de novembro na web da Fundación Juana de Vega, cun máximo de 50 prazas dispoñibles para profesionais interesados en asistir e participar no encontro. Acceso ao formulario e ao programa completo aquí >>

Por que?
Os xardíns históricos son testemuñas vivas da nosa historia cultural e natural. Representan espazos onde a arte do deseño paisaxístico se entrelaza coa biodiversidade, os coñecementos tradicionais e a memoria colectiva. Pero hoxe, fronte aos desafíos do cambio climático, da perda de biodiversidade e da presión urbana, a súa conservación require novas miradas e ferramentas.

Estas xornadas internacionais sobre “Restauración e xestión de xardíns históricos” queren ser un punto de encontro entre profesionais da paisaxe, da arquitectura, da ecoloxía, da historia e da xestión pública. Propoñen abrir un espazo para reflexionar e compartir experiencias sobre como abordar a restauración destes espazos desde unha perspectiva actual, integrando criterios ecolóxicos, culturais e sociais.

A restauración dos xardíns históricos non pode limitarse a unha reprodución formal do pasado, senón que debe procurar un equilibrio entre o respecto pola identidade e a adaptación funcional aos retos contemporáneos. Neste sentido, as xornadas porán o foco na aplicación dos principios da infraestrutura verde e das solucións baseadas na natureza para unha planificación, recuperación e xestión sostible a longo prazo, en coherencia co respecto á historia, desenvolvemento e evolución dos espazos históricos.