Linkedin-in Facebook-f Youtube

O documental "Un mar de mulleres" é seleccionado para a sección oficial do Festival de Cine do Mar de Marín

Share

O documental "Un mar de mulleres: o traballo feminino nas industrias do mar de Galicia", producido pola Cátedra Juana de Vega, co apoio da Fundación Juana de Vega e da Universidade de Santiago de Compostela, vén de ser seleccionado na sección oficial documental da 3ª edición do Festival Cine do Mar de Marín, tras ser escollido entre máis de 300 filmes procedentes de todo o mundo.

O documental é un proxecto audiovisual que pon en valor o papel fundamental das mulleres nas industrias do mar en Galicia, e que compartirá sección oficial con outros destacados documentais:

  • "A tarea", de Alfonso O'Donnell
  • "La mè a nan sa", de Fernando Martín e Elsa Suárez
  • "Si el silencio fuera azul", de Gabriela Muñoz, Magdalena Funezalida, Mª Jesús Cardemil, Benjamin Rojas e Marc Pompermayer
  • "Parangol", de Dinko Bozanic
  • "Polbeiros", de Ángel Cea
  • "Mar, vent, sol", de Xacobo Sanmartín

A proxección de "Un mar de mulleres" terá lugar o martes, 21 de abril, ás 20:00h, dentro da programación oficial do festival. Previamente, Luisa Muñoz Abeledo, directora da Cátedra Juana de Vega, presentará o documental xunto coa directora, Sabela Brand.

O xurado desta edición está composto por Gaspar Broullón, Nati Juncal e Anxos Fazáns, referentes do ámbito audiovisual galego.

Este recoñecemento reforza o compromiso da Cátedra Juana de Vega coa promoción do coñecemento, a cultura e a visibilización do traballo das mulleres, así como o apoio a iniciativas audiovisuais de carácter social e divulgativo vencelladas ao territorio e ao mar.

O documental Un mar de mulleres: o traballo feminino nas industrias do mar de Galicia, producido pola Cátedra Juana de Vega, co apoio da Fundación Juana de Vega e da Universidade de Santiago de Compostela, vén de ser seleccionado na sección oficial documental da 3ª edición do Festival Cine do Mar de Marín, tras ser escollido entre máis de 300 filmes procedentes de todo o mundo.

Que conta o documental “Un mar de mulleres”?

Amosar a importancia do traballo feminino nas industrias do mar de Galicia é o propósito do documental “Un mar de mulleres”. Dirixido por Sabela Brand, a través de entrevistas realizadas a mulleres ocupadas no sector pesqueiro e de transformados da pesca o documental dá conta da súa participación laboral, da fenda salarial de xénero así como dos cambios nas condicións laborais no período que cubre o último terzo do século XX e o primeiro do XXI.

Queda asemade reflectida na cinta a pegada da cultura mariñeira, da importancia da transmisión dos saberes femininos en actividades tradicionais que requirían cualificación e destreza manual coma a redería, o empacado de peixe ou o marisqueo, entre outras. Tamén reivindica o papel das mulleres emprendedoras, propietarias de barcos de pesca, xerentes de empresas de transformación e de distribución de peixe, sectores líderes da nosa economía.

Esta peza documental quere ser un tributo ás traballadoras do mar no pasado e no presente, de xeito que amosa historias de vida e traballo que demostran a capacidade de aprendizaxe, o tesón, a cualificación, a adaptación e a resiliencia en momentos de crise das mulleres do mar de Galicia. Elas contribuíron non só a modernización económica da rexión, senón tamén a manter uns orzamentos familiares con superávit e polo tanto a mellorar os niveis de vida das familias do litoral galego.