No cuarto boletín de DOWN TO EARTH (cofinanciado por Interreg) faise un repaso da actividade dos pasados meses e péchase o segundo ano de execución do proxecto, que se centrou en investigar as "Barreiras de acceso para novos agricultores en zonas despoboadas”. Neste sentido, os oito socios rexionais identificaron 14 casos de boas prácticas nos seus territorios que son innovadores, sostibles e replicables.
En Galicia, a Fundación Juana de Vega e a Axencia Galega de Desenvolvemento Rural (AGADER), presentaron seis das boas prácticas:
- A Aldea Modelo de Meixide (Concello da Veiga, Ourense), sobre incorporación de novos agricultores para a redución de incendios forestais.
- O matadoiro móbil da Xunta de Galicia para pequenos animais.
- A Fusquenlla, un centro de transformación agroalimentaria para pequenos agricultores no Concello de Moeche (A Coruña).
- A iniciativa “O sabor dos Ancares” da cooperativa A Carqueixa, produtora de IXP Ternera Gallega.
- O proxecto de ordenación da terra agraria a través de permutas en Lugo, unha ferramenta para combater o abandono en zonas rurais.
- Casas Niño en Galicia
Neste cuarto boletín de DOWN TO EARTH tamén se inclúe un resumo da visita de estudo á rexión de Gorenjska, en Eslovenia, da que foi anfitrión a BSC Kranj, Regional Development Agency of Gorenjska (foto 1 de grupo), así como da segunda conferencia temática que levou a cabo de forma paralela (foto 2).
