Novas / Escola Galega da Paisaxe

O Xardín do Recordo do Pazo do Faramello en memoria das vítimas de Angrois inicia o seu camiño coa plantación da primeira árbore nunha emotiva ofrenda

O propietario deste belo e emblemático enclave do Camiño Portugués cedeu máis de 7.000 metros cadrados de terreo para a construción deste xardín, cuxo proxecto paisaxístico foi realizado e doado pola Escola Galega da Paisaxe da Fundación Juana de Vega.

A nai de Laura Naveiras Ferreiros, de 21 anos e falecida no accidente, plantou a primeira árbore, que leva o nome da súa filla, nun emotivo acto que se pechou con música e cunha ofrenda floral

O obxectivo deste xardín é lembrar e render homenaxe ás vítimas do accidente de tren, cuxos nomes figurarán nunha placa conmemorativa. Cada un deles estará representado por un "árbore do amor", especie elixida para o bosque.

Este xardín situouse nunha zona de fácil acceso nunha contorna privilexiada cargada de historia e beleza natural.

Nai dunha das vítimas durante a plantación da árbore que recordará á súa filla falecida.
Responsables do proxecto e o dono do pazo.

Oleiros, 24 de xullo de 2014.- O grupo de investigación da Escola Galega da Paisaxe da Fundación Juana de Vega deseñou o proxecto paiaxístico para o Xardín do Recordo, presentado esta mañá no Pazo do Faramello, no municipio de Rois, co obxectivo de render homenaxe ás vítimas do accidente de tren de Angrois. Este proxecto paisaxístico doado pola Fundación para a execución deste parque, sitúase nunha contorna privilexiada, situado no final do Camiño Portugués, nunha parcela de 7.200 metros cadrados cedida polo propietario do pazo, Gonzalo Rivero de Aguilar, para o seu uso e visita cidadá.

No acto estiveron presentes o propietario do pazo, así como o director de Relacións Institucionais e Parlamentarias da Xunta de Galicia, Gonzalo Ordóñez, en representación da administración autonómica. Ademais, xunto co presidente da Fundación Juana de Veiga, Enrique Sáez, e o director da entidade, José Manuel Andrade, atopábase a directora da Escola Galega dá Paisaxe, Isabel Aguirre, que explicou os detalles do proxecto. Todos xuntos arrouparon e renderon emotiva homenaxe á familia dunha das vítimas do accidente, Laura Naveiras Ferreiros, de 21 anos, cuxa nai colaborou na plantación da primeira árbore e colocou a placa co nome da falecida nun emotivo acto, que culminou con música galega e unha ofrenda floral.

O deseño consiste nun percorrido axardinado no que se plantará unha árbore en representación de cada unha das vítimas, e onde figurará tamén unha placa representativa cos seus nomes. Este lugar é de moi fácil acceso xa que se trata do último pazo que existe antes de chegar a Santiago de Compostela polo Camiño Portugués. Explicaba Isabel Aguirre que o espazo nace coa vontade de servir como percorrido espiritual no que se poden lembrar aos seres queridos e ir curando as feridas. O xardín está situado en dirección norte-sur na cota máis elevada do pazo. A elección da árbore, da especie coñecida como "árbore do amor", responde o seu contido simbólico e á súa estrutura, con follas en forma de corazón. Ademais do paseo de arboredo o espazo incluirá unha área de acollida para reunión de grupos de visitantes ou familias, recuberto de hortensias e azaleas, grandes protagonistas da flora dos pazos galegos. Ademais, reservarase unha parte didáctica para que os nenos coñezan as técnicas de traballo da terra. Por último, crearase un xardín en movemento deixando que a natureza vaia evolucionando de maneira espontánea. O espazo linda co camiño que leva á pedra de meditación á beira do Río Tinto.

O pazo está aberto ás visitas e á celebración de eventos, e é un enclave cargado de beleza natural e de historia. Estanques, fontes, canles e pozas naturais fusiónanse coa pedra deste pazo, antiga fábrica de papel, a primeira de Galicia, con que cumpre este ano o seu terceiro centenario. O espazo conta con máis de dúas hectáreas de xardíns franceses decimonónicos en perfecto estado de conservación. En canto ao edificio, data de comezos do século XVIII e é de estilo barroco compostelán civil, con marcadas influencias italianas que delatan en orixe xenovés do seu fundador, o marqués de Piombino.

Deste pazo, construído sobre o canón do río, abundan as referencias históricas e literarias, sendo referencia de ilustres escritores galegos como Rosalía de Castro, Emilia Pardo Bazán ou Camilo José Cela. Ademais, o lendario castro celta da Raíña Lupa atópase situado nas marxes da leira, que foi escenario da "traslatio" do Apóstolo rumbo a Compostela e serviu de residencia estival do Rei Alfonso XIII e Luís de Baviera nas súas visitas a Santiago.


Comentarios