Novas /

Allariz, sede este ano da entrega de Vilas en Flor, obtén o maior recoñecemento xunto con Chantada no certame que premia os concellos con mellor xestión de espazos verdes

18 Novembro 2021

O certame, impulsado pola Fundación Juana de Vega, bateu récords de participación, con 30 concellos que obtiveron entre unha e catro flores de honra recoñecendo a posta en valor da súa paisaxe urbana e rural

A conselleira de Medio Ambiente e a alcaldesa de Allariz presidiron o acto, xunto co presidente da Fundación Juana de Vega, o delegado territorial da Xunta de Galicia en Ourense, o coordinador do programa e representantes do xurado

Na entrega das distincións participaron representantes da organización: Asociacion de Viveiristas do Noroeste (Asvinor) e Asociación Galega de Empresas de Xardinería (Agaexar), xunto con representantes das entidades patrocinadoras, Rain Bird, Husqvarna e Piaggio Commercial

Oleiros, 18 de novembro de 2021.- A edición 2021 do programa "Vilas en Flor" puxo onte o broche de ouro coa cerimonia de entrega dos galardóns, celebrada no Museo do Coiro de Allariz, coa asistencia da conselleira de Medio Ambiente, Territorio e Vivenda, Ángeles Vázquez Mejuto; o presidente da Fundación Juana de Vega, Enrique Sáez; o delegado territorial da Xunta de Galicia en Ourense, Gabriel Alén; o coordinador do programa e director da Escola Galega da Paisaxe da Fundación Juana de Vega, Pedro Calaza, e Javier Padín Martínez, Manuel Rodilla e Silvia Caffaro en representación do xurado. A anfitrioa deste acto foi a alcaldesa de Allariz, Cristina Cid, que ademais tivo dobre protagonismo porque de novo o seu concello obtivo o maior recoñecemento da edición, con catro flores de honra.

Este certame, impulsado pola Fundación Juana de Vega, ten como obxectivo a procura da mellora ambiental, social e económica dos concellos galegos a través das súas iniciativas a prol da posta en valor, conservación, integración e mantemento da súa paisaxe urbana e rural. Criterios que, segundo estimación do xurado, cumpre de xeito exemplar, ademais de Allariz, o Concello de Chantada, que obtivo tamén catro flores de honra.

Este ano, o cuarto en que se celebra este certame que segue o modelo de grandes pioneiros en paisaxismo como Reino Unido, Irlanda, Francia, Italia ou Canadá, bateuse o récord de participación, con 30 municipios. Todos eles recibiron entre unha e catro flores de honra, coas que se valoraron as accións desenvolvidas para mellorar e resaltar os seus espazos verdes urbanos, a xestión sostible, a educación ambiental e a concienciación cidadá no coidado da contorna.

Ademais da Fundación Juana de Vega, organizan o certame a Asociación de Viveristas do Noroeste (Asvinor) e a Asociación Galega de Empresas de Xardinería (Agaexar), e co parocinio de destacadas empresas: Rain Bird, Husqvarna e Piaggio Commercial. Tamén foi fundamental a aportación do equipo de xurado, formado por dez expertos, desde docentes universitarios ata enxeñeiros agrícolas de entidades públicas e privadas, arquitectos e mesmo historiadores, tanto de Galicia como de Portugal. Conformados en cinco grupos, tras realizar as correspondentes visitas procederon a consensuar as avaliacións en base aos criterios do sistema de valoración. Todos eles destacaron a excelente disposición, interese e facilidades amosadas tanto polos responsables técnicos como institucionais dos concellos nos que se realizaron as visitas e que acompañaron aos membros do xurado durante os percorridos polas localidades.

O proxecto persegue a mellora ambiental, social e económica dos concellos galegos, así como a dinamización do sector do paisaxismo e a ornamentación. Por tanto, o xurado avaliou aspectos como a adecuada implantación e xestión dos espazos verdes realizada polos concellos, así como a contribución das súas políticas ambientais ao desenvolvemento económico local, xerando máis actividade económica derivada do propio sector da planta ornamental e da xardinería así como dun previsible aumento de visitas turísticas.

Como resultado das súas valoracións, ademais das catro flores de honra para Allariz e para Chantada, o xurado outorgou tres flores de honra aos concellos de Gondomar, San Sadurniño, Narón, Mondoñedo, Salceda de Caselas, Ponteceso, Caldas de Reis, Fene, A Guarda, Cambados, Lalín, Salvaterra de Miño e Tomiño. Obtiveron dúas flores os concellos de Baiona, O Carballiño, Culleredo, Cuntis, Pontedeume, Sada, Sarria e Vilagarcía. Concedeuse unha flor aos concellos de Betanzos, Ortigueira, Tui, Oza-Cesuras, Miño, Mondariz e Guitiriz.

EXPERTOS INTEGRANTES DO XURADO

  • María Isabel Iglesias Díaz. Doutora en Ciencias Biolóxicas. Profesora titular na Escola Politécnica Superior da Universidade de Santiago de Compostela.
  • Carlos Cárcamo Álvarez. Enxeñeiro técnico agrícola do Concello de Ourense.
  • Camino Nicolás Velado. Directora do Centro de Formación e Experimentación Agraria de Guísamo.
  • Lois Arenas Barreiro. Enxeñeiro Técnico Agrícola. Xefe de explotación CFEA Guísamo.
  • Silvia V. Caffaro. Doutora Enxeñeira Agrónoma. Empresa: Viveros Florgalicia S.L.
  • Xurxo Xoán González Conde. Administrador de Viveiros Adoa 
  • Domingos Manuel Mendes Lopes. Director da Graduation de Arquitetura Paisagista da UTAD. Profesor do Departamento de Ciências Florestais e Arquitetura Paisagista da Universidade de Trás-os-Montese Alto Douro (UTAD).
  • Manuel Torres Labandeira. Doutor Enxeñeiro Agrónomo. Profesor titular na Escola Politécnica Superior da Universidade de Santiago de Compostela.
  • Manuel Rodilla del Barrio. Arquitecto Técnico.
  • Javier Padin Martínez. Arquitecto técnico e historiador.

Novas relacionadas

Entrega dos galardóns do certame Vilas en Flor Galicia 2021

A entrega dos galardóns de Vilas en Flor Galicia celebrarase o 17 de novembro en Allariz, para distinguir a posta en valor da paisaxe de 30 concellos de toda Galicia Un xurado experto no ámbito pro...

O xurado do certame Vilas en Flor completa as visitas aos 29 concellos participantes para deliberar sobre a súa xestión paisaxística e ambiental

Está formado por un equipo de dez expertos de universidades, administracións e entidades públicas e privadas, que destacaron o interese e a disposición dos técnicos e xestores dos municipios Na ...

O certame “Vilas en Flor” vén de emitir o fallo para outorgar as súas distincións aos concellos participantes nesta terceira edición que puxo en valor o deseño, xestión e mantemento dos espazos verdes urbanos coas súas flores de honra para os 26 concellos

Chantada e Allariz acadan de novo as catro flores de honra. O xurado distinguiu tamén a Caldas de Reis, Lalín, Tomiño e Salvaterra de Miño con tres flores; a os de A Guarda, Baiona, Carballiño, C...

Chantada e Allariz acadan as catro flores de honra como as vila máis fermosas de Galicia no certame Vilas en Flor

O xurado distinguiu tamén a Caldas de Reis e Salvaterra con tres flores. Ademáis de Portomarín, Ponteceso, Tomiño, Mondoñedo, A Guarda, Culleredo, Cuntis, Carballiño e Betanzos con dous. Pola s...

Os concellos de Chantada e Allariz recoñecidos pola boa xestión dos espazos verdes.

Nesta primeira edición do programa, impulsado pola Fundación Juana de Vega, AGAEXAR e ASVINOR, participaban tamén Caldas de Reis, con tres flores de honra; Betanzos, con dous, e Ortigueira, que lev...

A Fundación Juana de Vega, ASVINOR e AGAEXAR poñen en marcha en Galicia, o programa internacional Vilas en flor

Anualmente outorgaranse as Flores de Honra (entre unha e cinco flores) aos municipios participantes elixidos por un xurado especializado, como recoñecemento tanto a traxectoria como as accións levad...


Actividades relacionadas

Vilas en flor

Un recoñecemento ao labor dos municipios por mellorar o seu espazo urbano...


Comentarios