A Fundación Juana de Vega é beneficiaria e responsable de comunicación do proxecto Soil&WineResidues – Sostibilidade do solo de viñedo e aproveitamento ecoeficiente dos residuos vitivinícolas, cofinanciado polo Fondo Europeo de Desenvolvemento Rexional (FEDER) a través do programa Interreg Sudoe 2021-2027.
O proxecto ten como obxectivo principal avanzar cara a modelos produtivos de economía circular no sector vitivinícola do espazo SUDOE, mellorando a saúde e a calidade do solo do viñedo e aproveitando de maneira ecoeficiente os residuos lignocelulósicos xerados polas adegas. O consorcio integra 15 socios beneficiarios e 92 asociados de España, Francia e Portugal, e desenvolve actuacións piloto e de transferencia de resultados nos tres países.
1. Obxecto do servizo
Contratar un servizo de apoio para a xestión do gabinete de comunicación e a edición de contidos dos materiais de comunicación do proxecto Soil&WineResidues.
2. Características do servizo
O servizo incluirá as seguintes tarefas principais:
- Gabinete de comunicación: elaboración, planificación e execución, en coordinación coa Fundación Juana de Vega, da estratexia comunicativa do proxecto, garantindo a visibilidade e difusión, tanto a nivel interno como externo. Entre as súas funcións inclúese:
- Elaboración e execución do Plan de Comunicación, incorporando melloras durante o transcurso do proxecto para optimización das tarefas e alcance dos KPI.
- Xestión e actualización da web do proxecto (en catro idiomas) na plataforma Interreg SUDOE, tanto contidos estáticos como dinámicos. A selección de noticias farase en coordinación coa Fundación Juana de Vega segundo a evolución do proxecto. A web (WordPress) está aloxada na plataforma Interreg SUDOE.
- Comunicación a través de redes sociais:
- Definición e execución dunha estratexia de márketing dixital para trasladar as mensaxes ao público obxectivo do proxecto.
- Publicación, seguimento e monitorización de contidos nas redes sociais do proxecto.
- Redacción de contidos de materiais de comunicación: apoio na elaboración dos contidos do cartel, dos tres folletos, do roll-up, de infografías e de resumos prácticos do proxecto, etc.
- Gabinete de prensa: procura de oportunidades informativas e divulgación dos fitos do proxecto mediante a redacción de notas de prensa e envío a bases de datos. A base de datos de medios de comunicación será aportada pola axencia contratada. Adaptación e tradución das notas de prensa para seren distribuídas por todos os socios e asociados a través das súas redes e bases de datos de contactos con medios locais, co fin de acadar maior capilaridade e difusión.
Requisitos xerais:
- O adxudicatario deberá garantir a coherencia dos contidos coa estratexia de comunicación do proxecto.
- Todos os contidos deberán estar dispoñibles nos tres idiomas do programa (español, francés e portugués) e no idioma de traballo do consorcio (inglés).
- O adxudicatario traballará en coordinación coa Fundación Juana de Vega, como entidade responsable de comunicación do proxecto, e coa axencia de deseño gráfico contratada pola Fundación Juana de Vega.
- Os traballos deberán cumprir as normas de visibilidade do FEDER e de Interreg Sudoe.
3. Prazo de execución do servizo
O contrato cubrirá o período de execución do proxecto, desde a formalización ata o 31 de maio de 2028, cun calendario específico acordado entre a Fundación Juana de Vega e o provedor seleccionado.
4. Orzamento máximo
O orzamento dispoñible para esta contratación é de 30.000,00€ IVE incluído. Non se admitirán ofertas económicas que superen esta contía.
5. Procedemento de adxudicación
A contratación realizarase mediante procedemento de concorrencia competitiva entre as ofertas presentadas no prazo e forma indicados no anuncio da convocatoria.
6. Documentación a entregar coa oferta
- Oferta económica (desagregada sen IVE e con IVE incluído).
- Portfolio de traballos previos en xestión de prensa e comunicación dixital, incluíndo os traballos en proxectos europeos.
- Proposta organizativa e técnica para a execución dos traballos solicitados.
7. Criterios de adxudicación
- Oferta económica (70 puntos):
P = (PM × MO)/OF
P = Puntuación a outorgar a cada oferta
PM = Puntuación máxima para cada criterio (70 puntos)
MO = Importe da oferta máis barata (en euros)
OF = Oferta a valorar (en euros).
- Ademais da oferta económica, teranse en conta para a adxudicación os seguintes criterios cualitativos (30 puntos):
- Garantía e rapidez na xestión e distribución de contidos.
- Capacidade para asegurar a sustentabilidade nos formatos e canles de comunicación empregados.
- Experiencia en xestión de redes sociais e ferramentas dixitais colaborativas (Canva, CMS, etc.).
- Calquera outra mellora técnica proposta.
Ofertas anormalmente baixas
Co obxectivo de asegurar a calidade e viabilidade do proxecto, considerarase que unha oferta económica é anormalmente baixa cando o seu importe sexa un 20% ou inferior á media das ofertas recibidas.
Nestes casos, a entidade poderá solicitar ao provedor unha xustificación por escrito que explique como pode executar o proxecto con ese orzamento, incluíndo:
- Explicación de vantaxes competitivas, innovacións ou condicións excepcionais que permitan ofertar a ese prezo.
- Garantías de cumprimento dos requisitos técnicos e prazos.
- Calquera outra documentación que demostre a capacidade técnica e financeira para executar o contrato nos termos ofertados.
Se a xustificación non resulta suficiente, a entidade resérvase o dereito a excluír a oferta por considerala inviable.
8. Forma de pago
O pago realizarase contra a presentación de factura e previa conformidade da Fundación Juana de Vega coa prestación efectuada. A Fundación Juana de Vega poderá establecer pagos parciais en función dos fitos de entrega.
9. Confidencialidade e protección de datos
O adxudicatario queda obrigado a manter a confidencialidade sobre toda a información e documentación á que teña acceso durante a execución do contrato, así como a cumprir coa normativa vixente en materia de protección de datos.
10. Prazo e forma de presentación da oferta
- Prazo: 10 días hábiles* a partir do día seguinte á publicación da convocatoria, ata o luns, 6/10/2025 ás 23:59 horas.
- Envío: por correo electrónico a tgesto@juanadevega.org co asunto: "Soil&WineResidues – Contratación servizo gabinete de comunicación e contidos".
*Actualización a 30/09/2025. Comunícase que se advertiu no anuncio orixinal o seguinte erro:
- Onde dicía: “Prazo: 10 días naturais a partir do día seguinte á publicación da convocatoria.”
- Debe dicir: “Prazo: 10 días hábiles a partir do día seguinte á publicación da convocatoria.”