O martes 8 e o mércores 9 de outubro, a Fundación Juana de Vega organiza no CFEA Sergude (Boqueixón) as xornadas "Agromárketing para o sector lácteo". O director da Fundación Juana de Vega, José Manuel Andrade, achegouse ata Boqueixón para inaugurar esta formación especializada para o agro xunto co director do centro, Juan Carlos Férreas.
José Manuel Andrade subliñou a importancia do emprendemento e a innovación no sector agrario, destacando que, aínda que en Galicia contamos con produtos agroalimentarios de extraordinaria calidade, non é suficiente saber producir. "É esencial saber vender e diferenciarse no mercado", puntualizou. Neste contexto, animou aos alumnos do CFEA de Sergude a ver o sector agroalimentario como un ámbito no que existen oportunidades para emprender, convidándoos a aproveitar estas xornadas para aprender dos expertos as habilidades necesarias para a comercialización, e a inspirarse nos casos de éxito que se van a presentar para impulsar o seu futuro profesional.
Ademais do público externo que se anotou para asistir, participan uns corenta rapaces que cursan os ciclos superiores de Gandaría e Asistencia en Sanidade Animal (réxime ordinario e dual) e o Ciclo Medio de Produción Agroecolóxica.
Neste primeiro día de sesións haberá charlas sobre aspectos innovadores para mellorar a competitividade. Mañá, o programa complétase cunha mesa redonda con tres entidades sociais do territorio, así como cunha visita guiada á fábrica de queixos QUEIZUAR, situada na parroquia de Bama (Touro).
En concreto, na mesa redonda que moderará Elena López, técnica Fundación Juana de Vega, participarán QUEIZUAR, da man de Benigno Pereira Ramos, socio xerente e presidente do CRDOP Queixo de Tetilla; a cooperativa de servizos a productores de leite Cobideza, representada por Román Santalla, presidente da entidade e gandeiro; e a cooperativa láctea Pico Sacro, á que porá voz a súa xerente Patricia López López.
Estas xornadas organízanse no marco das axudas da Rede Eusumo - Economía Social de Galicia 2024 para a realización de actividades de promoción e impulso do cooperativismo e da economía social.
