A investigación do Grupo Operativo Avea Moura estará presente no congreso gastronómico Madrid Fusión

Share

O Grupo Operativo Avea Moura estará presente no congreso nacional de gastronomía contemporánea Madrid Fusión da man do restaurante Culler de Pau, un dos socios desta investigación aplicada da que tamén é beneficiaria a Fundación Juana de Vega. O chef Javier Olleros falará do seu traballo para a elaboración de fermentados a partir de 𝐴𝑣𝑒𝑛𝑎 𝑆𝑡𝑟𝑖𝑔𝑜𝑠𝑎 en varios eventos o luns 27 e o mércores 29. En concreto, participará nunha mesa redonda e tamén terá un relatorio propio de media hora no que a avea negra será protagonista do seu discurso.

Resumo do programa

Luns 27
16:30h | MF Dreams | Fundación Alícia. “Comprendendo o minimalismo”. Participación no relatorio de Ferrán Adriá desde a liña 0 do público con outros cociñeiros no momento do debate.

Mércores 29
11:10 a 11:50h | MF Dreams | Mesa redonda “Fermentados e encimas: seguros, sans e gastronómicos”

14:05 – 14:35h | Auditorio | Relatorio "Gastronomía da paisaxe: aprendendo a escoitar os ritmos da  natureza". Javier Olleros representará a visión de Culler de Pau a través deste 4 pratos que reflicten a súa misión e visión como restaurante: ser responsable á vez que excelente. Nos dous primeiros emprega Avena Strigosa.

  • Papas de arrandas de avea negra
  • Xoio (variedade silvestre da avea negra)
  • Flores guisadas
  • Bolo mariño

Que é o GO Avea Moura?
O consorcio do Grupo Operativo Avea Moura está formado polo Grupo de Adaptación e Sostibilidade de Cultivos da Misión Biológica de Galicia – CSIC Galicia (líder); a Fundación Juana de Vega, a cooperativa Muuhlloa e o restaurante Culler de Pau. En calidade de colaboradores, completan o equipo o CIAM da Axencia Galega da Calidade Alimentaria (AGACAL) – Consellería do Medio Rural, o Instituto Ourensán de Desenvolvemento Económico (Inorde), a Panadería Dacuña, a Universidade de Santiago de Compostela e a Universidade da Coruña.

Durante tres anos (1 de setembro de 2023 ao 30 de setembro de 2026), as entidades validarán coas súas investigacións o potencial comercial e tecnolóxico das variedades tradicionais das aveas negras galegas (Avena Strigosa) mediante a súa transformación en produtos de alto valor engadido como fermentados, produtos de panadería e produtos cosméticos. O valor engadido das aveas negras, ademais da súa gran rusticidade, presenta un compoñente de alto valor funcional como as avenatramidas e os tocoferois.

Este proxecto foi un dos seleccionados para ser financiados con 179.451,00€ na pasada convocatoria 2023 das Axudas para a Execución de Proxectos Innovadores dos Grupos Operativos da Asociación Europea da Innovación (AEI), cofinanciadas co Fondo Europeo Agrícola de Desenvolvemento Rural (Feader) no marco do Plan estratéxico da política agraria común (PEPAC) 2023-2027.