A Fundación Juana de Vega e a Axencia Galega de Calidade Agroalimentaria (AGACAL) abren a inscrición no último curso de formación en fruticultura que impartirán este ano e que estará dedicado ao aproveitamento e transformación de produtos frutícolas.
O curso, de nivel básico e carácter práctico, desenvolverase entre setembro e decembro en sete xornadas (40 horas) en horario de tarde (16:00 a 20:00h) entre o CFEA de Guísamo de Bergondo (AGACAL) e a sede da Fundación Juana de Vega. Tamén haberá unha visita de campo (data a concretar) e en decembro terá lugar a sesión de cata dos produtos elaborados coincidindo coa entrega dos diplomas.
O alumnado estudará as operacións de colleita e conservación da froita de maneira transversal a todas as producións frutícolas. Completarase con varios talleres prácticos para elaboración de zume de froitas, de sidra de mazá, de conservas e un último durante o que o alumnado aplicará outras técnicas de conservación tales como deshidratados, macerados, confeitados, xaropes, infusións ou licores. Ver programa completo aquí [PDF]
Inscrición abertas e bolsas para o alumnado do CFEA de Guísamo
A inscrición e pagamento realízase a través da web da Fundación Juana de Vega, onde tamén se pode consultar o programa completo. Só se ofertan 20 prazas e o custo é de 100€. A data de inicio é o xoves, 5 de setembro.
- Acceso ao formulario aquí: https://juanadevega.org/xornadas_e_cursos/fruticultura-2024-curso-de-aproveitamento-e-transformacion-de-produtos-fruticolas
